بسم الله
ای ابوالفضل دقتیله باخ یل صحرا منم
بولمرم گورخی نهنگ وحشت دریا منم
مدت عمریمده من چوخ پهلوان ئولدور میشم
چونکه نامی جنگ ایدن لر ایچره استثنا منم
جنگیده چوخلار بولر رحم و مروت بولمرم
رزمگاه ایچره سالان وحشت لی بیر غوغا منم
کیم حریف اولسا منه باشی بدندن آیریلار
ئولدورن ئوز دشمنین میداندا بی پروا منم
آدیمه مارد دییلر من صدیفین اوغلویام
دشمنه پیروز اولان میداندا برق آسا منم
ای ابوالفضل دلاور گلمیشم پیکارووه
ایندی بو میدانیده آماده ی دعوا منم
ماردا سن هر کیم اولسان نوکر مولا منم
گوزلری یولدا قالان عطشانلارا سقا منم
جنگ صفینون زمانی چیخمیوب یاددان هله
لشگره بی واهمه حمله ایدن اوردا منم
شیر یزدان اوغلونون من شیر بی پروا سییم
سرور آزادگان حکمین ایدن اجرا منم
من حسینون جان نثاری سن طرفدار یزید
سن اجیر ابن سعد عبد شه والا منم
دقتیله باخ منه آللانما ئوز اندامیوه
حیدر ثانی منم عنقای عاشورا منم
بیر بله من من دیمه یوم آغزووی آچ اللرون
تا اولا معلوم که فاتح بوردا سن سن یا منم
اسکندر غفاری